Ամենաերկարակյաց կանայք «հաստլիկներն» են. news.am

Ավելորդ քաշով կանայք ավելորդ քաշով տղամարդկանցից ու նույնիսկ նորմալ քաշ ունեցող կանանցից ավելի երկար են ապրում: Նման եզրակացության են հանգել Քլիվլենդի հիվանդանոցի Կանանց սրտանոթային հիվանդությունների կենտրոնի (Cleveland Clinic Women's Cardiovascular Center) հետազոտողները:

Նրանք ուսումնասիրել են սրտային անբավարարությամբ տառապող 3800 տղամարդու ու կնոջ կյանքի տեւողության ցուցանիշները: Պարզվել է, որ, նույնիսկ հաշվի առնելով այնպիսի գործոններ, ինչպիսիք են շաքարախտը, ծխելն ու դեղերի կանոնավոր ընդունման անհրաժեշտությոնը, միեւնույն է, մարդկանց սեռի, նրանց քաշի ու կյանքի տեւողության միջեւ որոշակի կապ կա:

Հետազոտողները հայտնել են, որ կանանց բնորոշ է ճարպակալման պարադոքսը: Մասնավորապես, նրանք պարզել են, որ մարմնի զանգվածի 25-29.9 գործակցով կանայք կյանքի ավելի երկար տեւողություն ունեն, քան նույն գործակցով տղամարդիկ, կամ այն կանայք, որոնց քաշը նորմայի մեջ է: Սակայն, եթե ավելորդ քաշը չափից մեծ է, այսինքն, մարմնի զանգվածի գործակիցը 40-ից բարձր է, նման առավելություն այլեւս չի նկատվում:

Մարմնի զանգվածի գործակցի համար նորմա է համարվում 18.5-ից 24.99-ը:

Կանանց վրա ճարպակալման նման հակասական ազդեցության պատճառները դեռ հայտնի չեն: Վարկածներից մեկով, դա կարող է պայմանավորված լինել նրանով, որ ավելորդ քաշով կանայք ավելի շատ են ճարպաթթուներ գործածում, որոնք խթանում են բջիջների աշխատանքը:

Հարցեր, պատասխաններ, մեկնաբանություններ